banner ad

Warriors just remove Enyimba

| May 7, 2013 More

<!–

–>
<!–


Fantasy



Store

–>

Ogbonge Naija Lig club, Enyimba no go lailai bilf wetin dem take dia korokoro eye see as Lowa Naija Lig club, Abia Warriors take style nack dem 1 kondo for de Abia State FA cup final wey dem play on Sunday.

Even wen Lion wey na him be de baba for all animals see Elephants, fear go catch am, but Abia Warriors kon prove say dem sabi as dem jus take only one bullet skatta Enyimba wey dia nickname be Pipu Elephants.

As you know say Elephants too get gragra for body, naso Enyimba take stat de game, but de Warriors jus dey luk dey take style dey study de area wia dem go take hamma dem.

Na 1-0 de game kon finish as Enyimba try make dem ekwalise, but de odeshi wey Warriors get strong die as dem no gree open dia yans for de Elephants.

For de Delta State FA final wey dem play on Sunday, Gift Atulewa na him be de guyman wey helep Naija Lig club, Warri Wolves flog Atete FC 1-0 as de sabi strika waya de gol in de 88th minit as Warri Wolves take style be de baba for Delta State.

Nasarawa United take Police Machine drink gari as dem nack dem 3-0 for de Nasarawa State FA cup final wey dem play for Lafia.

De match sef no tof for de Naija Lig club, Nasarawa United as de Olopa pipu jus dey run around de field like agbero as dem suffa from de stat till de match finish.

Wahala hapen for Bayelsa as Nembe City no gree finish dia match against Bayelsa United for de Bayelsa State FA cup final on Sunday.

Bayelsa United bin dey lead 2-1 bifor Nembe City kon ekwalise for de secon haf, but de centa refiree, China Blessed from River State kon disalow de secon gol wey Nembe score and na de tin wey make Nembe Boys vex kommot for de field be dat.

Gombe United also don win de Gombe State FA cup afta dem bulala Yarma Light FC for de final 3-1 on Sunday as na de two of dem go represent Gombe for de nationa finals.

Tiwa Warriors sabi play ball die as dem kommot plenti sweat for de body of Naija Lig club, Sunshine Stars, but na de Stars laf last as dem waya de Warriors 4-2 for de Ondo State FA cup final wey dem play on Sunday.

Na Heartland be baba for Imo State as dem manage nack Bussdor 2 kondo to carri de FA cup for dia own side on Sunday.

De current Naija Lig club wey dia name be Kano Pillars vex for de 4-0 wey Enugu Rangers nack dem las wik for de Naija Lig wik 9 game wey dem play for Enugu.

De Sai Masugida as plenti pipu dey call Kano Pillars skatta Samba Boys 3-0 for de Kano State FA cup final wey dem play for de Sani Abacha Stadium wey dey for Kano on Sunday.

Buhari Musa score two gols for Kano Pillars in de fes haf, while Usman Abba waya de third gol for dem in de secon haf.

For Bauchi, Wikki Tourist waya dia small pikin team, Wikki Feeders 2-1 for de Bauchi State FA cup final on Sunday.

Category: Bauchi State News

Comments are closed.